Ja nisam Dudek

Kaj da velim, neje baš idealno. Puno delam, al ne žalim se, neje me žmefko. Al' štel bi malo i doma biti. Ne doma v kuhinje pri pećki sedeti, nego doma kakti sloboden biti. Z pajdaši si gemišta spiti, naglas se smejati, malo bedast biti. Pak si zato kadikad v birtiju pri cirkvi, kod Jančija, zavrnem. Kad se čovek čez selo mora prepelati red je da se negdi zastavi. Stare navade se moraju poštivati. Tak sam si ja te večeri mislil pak sam se pri Jančiju zastavil. Gemišta sam si naručil, stal na kraj šanka kaj nikome ne smetam, pak v miru poslušam svu tu zajebanciju. Najglasneši su Krunči i Markina. Krunči danfa cigaretlina za cigaretlinom, žuti je kaj kakev maček. Markina ima mesto naočali pepeljare, veliki je skorom do stropa, a smrdi da te bog sačuva. On svinje hrani, a v slobodno vreme z Krunčijem drva z šume zvlači. Oni su dva stara ekipa. Ne da su kaj v životu zaslužili, stari dečki su još k tome bili, al su navek peneze za platiti rundu imeli. Za to im je ne nikad sfalelo.

Sam si pomislil kak je njima baš lepo, celi dan se zajebavaju po selu, delaju kaj hočeju i kad hočeju, pak sam im onak od dobre vole, sam od sebe rundu platil. Su se začudili kaj me nisu prije primetili. Zafalili mi i pitali čim se bavim zadnjih dana. Kaj čim, pri meni je sve navek isto. Na posel i s posla, tu promene nema. Kimali su glavom, filozoferali da je tak kak je, kad več drugač nemre biti. Kimal sam i ja, Jančiju sam mignul neg nam mam još jedne natoči. Nekak mi se pri srcu zgrejalo. Neje se v poslu, negda si čovek valjda more oduška zeti, z pajdašima vu zajebanciju vudriti. Onda su me pitali da kak mi je na tom poslu, kaj točno delam. Povedal sam im sve po istini. Lepo mi je, na toplom sam i čistom, nikad lepšeg posla nesem imel. Falim se, kaj bum drugom kad tak i mislim. Al' je od toga dalje sve nekak krivo krenulo. Kad su me pitali za plaču su se počeli smejati da je to ne plača nego plač, kaj je to stvarno istina da za tak male peneze delam. Sam se osetil pozvanim svoju firmu braniti.

Neje to bila mala plača, bila je normalna, čak malo veča nego prije kad sam stalno vuni delal, na dežđu i na snegu, aha, niko te ne pita, sad je čist drukčije. Kaj stvarno? Vleču mi njihove reči na norčiju. Za stvarno, to kaj delam v pogonu je, verovali vi to ili ne, za mene veliki napredak. Osim kaj mi je toplo, v kratkih rukava sam cele dane, nekakvog novog stroja sastavljam, niti ruke si prav ne zmažem. Kad si pod stroj legnem čisti se zdignem, po sto put tak i ništ, navek čist. Nema više za mene ni blata i ni zime. Nemam se zakaj žaliti, dobro mi je. Jedino morti radno vreme da je bolje. Videl sam huncnute kak mi se sve više smeju, šteli bi znati kaj z radnim vremenom ne valja. A ja sam takov, iskren, pak im povedam po istini. Delam svaki dan do mraka, delam svaku subotu, al neje mi teško, nekak si navek mislim gda moram doma iti da bi mogel još malo potegnuti. Sve sam v strahu kaj mi šef ne bi slobodnoga dana dal, a negda mi dojde kaj bi i v nedelju na posel išel. Sva sreča da je šef dober pa mi negda čak dozvoli kaj i v nedelju na posel dojdem. A kaj bum doma? Pak znate i sami da ja grunta nemam, a kaj bum z ženom, punicom i detetom v kuhinje graha zbiral? Bum malo brus! Rađe sam ja lepo na poslu.

Inače se ponosim, kak i svaki drugi normalni čovek, z svojim korenima. Kak voli reči Zagorec za sebe da je Zagorec, Međimurec da je Međimurec, Dalmatinec da je Dalmatinec, Slavonec da je Slavonec, tak se i ja ponosim kaj sam Podravec. Podravec sam od rođenja, Podravci su bili svi moji stari, čak i po ženinoj strani. Al mi nije nekak pasalo kad su mi počeli ti huncnuti pri Jančiju nadevati da sam pravi Dudek, Podravec i Dudek od glave do pete. Počeli su se norčiti z mene da sam naivec.

Da oni tuliko pri Jančiju zapijeju vu tjedan dana za kuliko ja celi mesec na posel hodim. Janči je z krpom zbrisal zlejano vino spodi čaša; je, tak je, huncuti po istini povedaju. V mehi kuha, gruntam. Lepo je bilo na televiziji videti kak se vu Gruntovčanima lepo kaže Podravina i kak sve te dogodovštine Dudeka i njegove Regice zabavljaju naciju. Al' mi je počesto bilo žmefko gledeti kak svaki vrag Dudeka nasamari i kak da su onda zbog tog Dudeka svi Podravci Dudeki bili. V našoj brijačnici na zavoju i na našem groblju su se snimale neke serije tih Gruntovčanov. Nama v selu neje bilo svejedno kad bi vidli kak Dudeka svaki vrag nasamari. Smeju mi se Krunči i Markina da sam Dudek. Srdim se, več ne znam jel' zbog pravog Dudeka ili kaj sam ja predmet zajebancije.

Trgnul sam se. Takovi klipani budu meni, da sam Dudek, spotikavali! Derem se kaj nori, ne dam se. Smeju mi se da ništ ne razmem, da sam ne nikakov šefov ljubimec, neg obratno! Tera me da delam kaj marha kaj bi si sam otkaza dal, kaj me ne bi on trebal otpuščati. Ne razmete, vi ništ, huncuti jeni! Drmaju se stolci i čaše po špiglu iza Jančija. Dudek, Dudek, Dudek, čini mi se kak da mi celi svet spotikava. Vudril sam šakom po stolu. Krunči i Markina su se z otprtimi lampami zastavili, su skužili da bi za ve bilo dosti. Od Jančija zdignute glave odlazim. S praga se okrečem i zakričim da me i žohari v zahodu čuju: Ak sam i Podravec, nesem i Dudek! I bolje bi mi bilo da sam na poslu ostal!

Darko Pero Pernjak

Facebook komentari
Komentari ispod članaka ni na koji način nisu stavovi uredništva Varaždinskih vijesti te su za njih odgovorni isključivo čitatelji. Ističemo kako je stav redakcije da je zabranjeno vrijeđanje, govor mržnje te poticanje diskriminacije na osnovi rase, etničke pripadnosti, boje kože, spola, jezika, vjere, dobi, rodnog identiteta ili spolne orijentacije. Svi komentari za koje uredništvo procijeni da su neprikladni bit će obrisani, a njihovi autori prijavljeni nadležnim tijelima.

Varaždinske-vijesti.hr koriste kolačiće (eng. Cookies) radi pružanja što boljeg korisničkog iskustva. Ako nastavite koristiti ovu web stranicu prihvaćate korištenje kolačića.